ഒരു വ്യവഹാരിയെ പ്രണയിക്കുന്നത്

ഒരു വ്യവഹാരിയെ പ്രണയിക്കുന്നത് 
അങ്ങേയറ്റം ക്ലേശകരമായ ഒന്നാണ്. 
ചോദ്യങ്ങളും ഉത്തരങ്ങളും, 
ഉമ്മകൾക്ക് കൂട്ടുവരും. 
വാദങ്ങളും പ്രതിവാദങ്ങളും 

നിരന്തരം കയറിയിറങ്ങിപ്പോകുന്ന -
ഒരു പ്രണയ ജീവിതം.
മടുപ്പിനാൽ വിളറി,
ദിവസങ്ങൾ അനക്കമറ്റ്‌-
തുടങ്ങിയേടത്തു തന്നെ അവസാനിക്കും.....
സന്ധ്യകൾപോലും,
പ്രണയത്തിൻ ലഹരി നുകരാൻ മടിക്കും.
രാത്രിക്ക് എത്ര നീളമേറിയാലും
കനത്ത ബയന്റിട്ട തടിയൻമാർ, പുസ്തകങ്ങൾ,
മുറിക്കുള്ളിൽ
വകുപ്പും ഉപവകുപ്പും തിരയും.
കുളിരു ചൂടിക്കാൻ, ഒരുവൾക്കു തോന്നാത്തവിധം,
പ്രഭാതങ്ങൾ പുലരാതെ മടിപിടിച്ചുറങ്ങും.
പിന്നെ മടുപ്പിന്റെ,
ഒരേ വൃത്തത്തിൽ കറങ്ങും.
ഒരു ചേർത്തുപിടിക്കലിന്റെ തണുപ്പിന് ,
വാദിയും പ്രതിയുമല്ലാത്തവൾ
വകുപ്പുകൾ തിരയേണ്ടതില്ലെന്നുറപ്പിക്കും.
ആത്മാഭിമാനം എന്നതിന്-
പര്യായ പദങ്ങളില്ല എന്നവൾ കുറിച്ചു വയ്ക്കും