ഉപ്പില്ലെങ്കിൽ ഇത്തിരി കുടിക്കാരുന്നു

മഴക്കാറിനൊപ്പം തിരിച്ചുവരാമെന്നു കരുതി 
കൊടിയ വേനലിൽ വാനമേറിയ ഒരുവളുണ്ട് 
നീരെല്ലാം ഊറ്റിയെടുത്ത ഒരു ഉണക്കത്തൊണ്ട്. 
ഒരു മെഴുകുതിരി വെളിച്ചത്തിൽ -
അന്നത്തെ അത്താഴം കഴിച്ചു കൊണ്ടിരിക്കുമ്പോൾ ,

പെട്ടന്നവൾ യാത്ര പറഞ്ഞുപോയി.
സ്നേഹമെന്ന കള്ളമേഘത്തെക്കാണിച്ച്‌,
ഇനിയും എന്നെ ഊറ്റിയെടുക്കല്ലേ
എന്നൊരു കുറിപ്പ്, കയ്യൊപ്പ്, ശേഷിപ്പ്!
ഏഴു സമുദ്രത്തിലും ഇപ്പോഴവൾ -
പെയ്തിറങ്ങിയിരിക്കും....
ഭയക്കാതെ, നടുങ്ങാതെ, നേരായിത്തന്നെ.
അപ്പോഴും നിങ്ങൾ പറയും,
ഓ ! ഉപ്പില്ലെങ്കിൽ ഇത്തിരി കുടിക്കാരുന്നു എന്ന്