പെണ്ണൊരുത്തി

കേൾക്കാൻ കൊതിച്ച ഈണവും 
കാണാൻ കൊതിച്ച മുഖവും 
എന്തിനെന്നറിയാതെ, സ്മരണയിൽ 
തിക്കിത്തിരക്കിക്കയറവേ ,
ഉരിഞ്ഞു വീഴുന്ന ഓരോ അടരും 
വെളിപ്പെടാനുള്ള വഴിയൊരുക്കവേ
കഠിന താപത്താൽ ഒരുവൾ
തലയറഞ്ഞ്, മാറുലഞ്ഞ്,
കളങ്ങളെല്ലാം മായ്ക്കവേ
ഭയപ്പെടാതെ, ഭയപ്പെടാതെ
എന്നുരുവിട്ട് ..
കാത്തിരിപ്പിന്റെ വാതിലുകൾ
ഒന്നൊന്നായ് കടന്ന്
ഉറയൂരിയെറിഞ്ഞ പ്രാണനെ
വെയിലേറ്റു പൊള്ളാതെ, കുരുതിക്കൂട്ടിലെറിയാതെ
ഉള്ളം കയ്യിലെടുത്ത് ,
ഉടവാളും, കാൽച്ചിലമ്പും, അരമണി കിലുക്കവുമായി 
പെണ്ണൊരുത്തി പടി കടന്നു വന്നു