എന്റെ പേര് സീത..

എന്റെ പേര് സീത.. 
രാമൻ മാനിനെ പിടിക്കാൻ പോയപ്പോൾ, 
ലക്ഷ്മണനാണ് എന്നെ വട്ടം വരച്ച് അതിനുള്ളിലാക്കിയത്., 
ഞാൻ ചോദ്യങ്ങൾ ചോദിച്ചൂന്ന്, 
ഞാൻ ഭയങ്കരിയാണെന്ന്. 
ജ്യേഷ്ഠനേക്കാൾ അധികാരി അനുജൻ,
പിന്നെയാണ് രാവണൻ വന്നത്
ചോദ്യങ്ങളൊക്കെ അപ്പഴും ഞാൻ ചോദിച്ചൂട്ടോ
നിലക്കാത്ത ചോദ്യങ്ങൾക്ക്
മറുപടി പറഞ്ഞ് മറുപടി പറഞ്ഞ്
പുഞ്ചിരിച്ചു കൈ നീട്ടി
വൃത്തത്തിൽ നിന്നെന്നെ പുറത്തു ചാടിച്ച്
പുഷ്പക വിമാനത്തിലേറ്റി
കാടും നഗരവും കടലും കടത്തി
അവൻ സുന്ദര നഗരിയിലെത്തിച്ചു
പിന്നെ വീണ്ടുമൊരു വൃത്തം വരയ്ക്കാതെ
കാറ്റിനും കിളികൾക്കും പൂമരങ്ങൾക്കും
എന്നെ മുഴുവനായും വിട്ടുകൊടുത്തു ..