വീടും വീട്ടുകാരനുമില്ലാത്തവൾക്ക്

വീടും വീട്ടുകാരനുമില്ലാത്തവൾക്ക്
ആരേയുമൊന്നിനെയും കാത്തിരിക്കാനില്ലാത്തവൾക്ക് 
രാവും പകലും ഒരുപോലെ,
കാറ്റത്തിട്ട പതിരുപോലെ
അവളങ്ങു പാറിപ്പാറിപ്പോകും.
തെങ്ങിൻ തോപ്പും, ഞാലും, പുഴയും കടന്ന്,
കോടേരി കുന്നു കേറും.
വീണ്ടും മുള പൊട്ടും, കനം വയ്ക്കും, പാലൂറും.
വിളവെടുക്കാൻ, വീടും, വീട്ടുകാരും,
നാടും, നാട്ടുകൂട്ടവും, ഞാൻ, ഞാൻ
ഞങ്ങൾ, ഞങ്ങളെന്നലറും ..
---------------------------------------------------------------------------------------------------------------------
വീടും വീട്ടുകാരനും ഇല്ലാത്തവൾക്ക് മാത്രല്ല, വീടും വീട്ടുകാരും ഇല്ലാത്തവനും .....
---------------------------------------------------------------------------------------------------------------------

വീടും വീട്ടുകാരിയും ഇല്ലാത്തവന് 
കനവില് മാത്രം നിലാവും കടലുമുള്ളവന്,
അവൻ മുഷിഞ്ഞ മുണ്ടു പോലെ,
പിന്നാമ്പുറത്തെങ്ങാണ്ട് ചുരുണ്ടു കൂടി കിടപ്പുണ്ട്.
ഒരേയൊരുമ്മയാൽ ഉണർന്ന്,
അഴുക്കെല്ലാം തൂത്തെറിഞ്ഞ്,
പിന്നെ പെരിയ ശാഖികൾ പടർത്തി
തണലായി, ഉണ്മയായ് വീണ്ടും,
വിതയ്ക്കാൻ ഒരുങ്ങുന്നുണ്ട്.
പ്രണയത്തിൻ പ്രാചീന വിത്തുകൾ...
വീടും വീട്ടുകാരും , നാടും നാട്ടുകൂട്ടവും
ഭയക്കുന്നുണ്ട്, നടുങ്ങുന്നുണ്ട് ..
അന്തകവിത്തിനെ വെല്ലുന്ന പ്രാണനെ ..