മാധവിക്കുട്ടി മലയാളിപ്പെണ്ണിനു കൊടുത്തിട്ട് പോയത്

ഞാൻ പ്രണയപാശത്താൽ ചുറ്റപ്പെട്ടവൾ

എന്റെ കാലുകൾ നിലത്തുറക്കുന്നില്ല

കൈകൾ ബലമില്ലാതെ തൂങ്ങി കിടക്കുന്നു

എനിക്ക് ഭൂമിയെ ചുറ്റുന്ന

ചന്ദ്രനെ കാണണം

നിലാവും, രാത്രിയും മണക്കണം.

ഞാൻ പ്രണയപാശത്താൽ ചുറ്റപ്പെട്ടവൾ

എനിക്ക് തനിച്ച് നടക്കാനാവതില്ല

പൂവും പൂമ്പാറ്റയും പുഴുവും

കാട്ടിലെ പാട്ടും എനിക്ക് വേണം

കഥകൾ പറഞ്ഞു കേൾക്കാൻ

എന്നത്തെക്കാളും ഇന്നെനിക്ക്

കൊതിയുണ്ട്

ഞാൻ പ്രണയപാശത്താൽ ചുറ്റപ്പെട്ടവൾ

എനിക്ക് രാധയും മീരയും ആകണ്ട

ഒരു മാധവിക്കുട്ടി മനസ്സിലുണ്ട്

പുന്നയൂർക്കുളത്ത് നിന്ന്

നിർമ്മലമായ മനസ്സോടെ

കഥ പറഞ്ഞു തന്ന പ്രണയിനി

എന്നെ പ്രണയ പാശത്താൽ

മുറുക്കിയത് അവരാണോ

കുഞ്ഞു കുഞ്ഞു വാക്കുകളിലൂടെ

വലിയ വലിയ ലോകങ്ങൾ

പാവം മലയാളിപ്പെണ്ണിന്

തുറന്നു കൊടുത്ത മഹതി