ചന്ദ്രികയിൽ അലിയുന്നു ചന്ദ്രകാന്തം

ചന്ദ്രികയിൽ അലിയുന്നു ചന്ദ്രകാന്തം
എന്ന പാട്ട് അമ്മ പാടുന്നത് കേട്ടാണ്ത്രേ
അച്ഛന് മുടിഞ്ഞ പ്രേമം തോന്നീത്
ഒരു പോറലും പറ്റാതെ
അവരുടെ ചന്ദ്രികയെ അവർ എന്നും കാത്തു പോന്നു
പക്ഷേ പെട്ടന്നാണ്
അവരുടെ നിലാവ് മാഞ്ഞു പോയത്
നഷ്ടചന്ദ്രികയോർത്തുള്ള
അമ്മയുടെ ഈ  ഇരുപ്പ്
ആരെയും സങ്കടപ്പെടുത്തും
കയ്യിലുണ്ട്
ഉർവശി ബൂട്ടാലിയയുടെ പുസ്തകം
അപ്പുറത്ത്
വ്യാസമഹാഭാരതം തർജ്ജമ
മുന്നില് ടെലിവിഷൻ വാർത്ത
ചുറ്റും പേരക്കുട്ടികൾ
എനിക്ക്, ഒരു 20 കൊല്ലം കൂടി
ഇങ്ങനെ പോയാ മതീന്ന്
ഇടയ്ക്കിടെ ദീർഘനിശ്വാസം.
ഇന്ന് ചന്ദ്രഗ്രഹണാണ്ത്രേ
ഞാൻ തല തണുപ്പിക്കാംന്ന് വച്ചാ
ഗ്രഹണത്തിന്റന്ന്  മൈലാഞ്ചി തലയിൽ തേച്ചത്
പക്ഷേ ഒരു രക്ഷയില്ലല്ലോ
കണ്ട് കണ്ട് തളർന്നു
നെഞ്ചിലൊരു കല്ലുമായി
അടക്കിപ്പിടിച്ച നിലവിളിയുമായി
ഒരാളിങ്ങനെ കൂടെ
മറ്റെയാൾ ഇവിടെ എവിടെയോ ഉണ്ട്
ഞാനും അതാണ് തിരയുന്നത്
എനിക്കും അത് കേൾക്കാൻ  കൊതിയാണ്
രണ്ടു പേരുടെയും
ചന്ദ്രികയിൽ അലിയുന്നു ചന്ദ്രകാന്തം ..